طاجين الكفتة بالبيض و الجلبانة

نجيب الطاجين ديالنا، وندير فيه مطيشة محكوكة، شوية ديال الثومة، القزبور، المعدنوس، زيت المائدة، زيت الزيتون، الملح، الابزار، التحميرة، الكمون. كنخلط كلشي مزيان، وكنخليو لا صوص طماط تبقى على خاطرها.

من بعد ما المطيشة دخلت معاها الطياب، كنضيفو الجلبانة (مجلجدة أو فريش). نحركو مزيان وكنخليو الجلبانة تطيب على خاطرها.

في بولة، ندير الكفتة، مع شوية ديال المعدنوس، البصل محكوكة ومعصورة من الماء ديالها، الملح، الابزار، التحميرة، و الكمون. نحركو و نخلط كلشي مزيان.

من بعد ما الجلبانة كتطيب، كندخلو الكفتة معاها الطياب مزيان، ونسدو عليها حتى تطيب.

من بعد ما الكفتة طلقت ليدام ديالها وطلقت البنة فالتاجين، كنطرطقو واحد البيضات، وكنزيدو الطاجين ديالنا حتى كيطيب.

من بعد كنضيفو شوية ديال الابزار من الفوق، شوية ديال الربيع.